ஜனாதிபதி வேட்பாளராக தேசிய மக்கள் சக்தி அனுரகுமார திஸாநாயக்கவை பெயரிட்டிருக்கின்றமை ஜனாதிபதி ரணில் விக்ரமசிங்கவுக்கு எந்த வகையிலும் சவாலாக அமையப்போவதில்லை என முன்னாள் நாடாளுமன்ற உறுப்பினர் ஆஷூ மாரசிங்க தெரிவித்துள்ளார்.
ஐக்கிய தேசிய கட்சி தலைமையகமான சிறிகொத்தவில் இடம்பெற்ற செய்தியாளர் சந்திப்பில் கலந்துகொண்டு கருத்து தெரிவிக்கையிலேயே இவ்வாறு தெரிவித்தார்.
‘அடுத்தவருடம் இடம்பெறவிருக்கும் ஜனாதிபதித் தேர்தலுக்கான வேட்பாளர்களை தெரிவுசெய்யும் நடவடிக்கையில் எதிர்க்கட்சிகள் ஈடுபட்டுவருகின்றன. டலஸ் அணி இது தொடர்பாக ஜே.வி.பி மற்றும் ஸ்ரீ லங்கா சுதந்திரக்கட்சி ஆகியவற்றுடன் கலந்துரையாடல்களை மேற்கொண்டுள்ளன. எதிர்காலத்தில் ஐக்கிய மக்கள் சக்தியுடனும் கலந்துரையாடுவார்கள். ஆனால் இவர்கள் யாருக்கும் நாட்டை முன்னுக்கு கொண்டுசென்று, அபிவிருத்திசெய்ய எந்த திட்டமும் இல்லை.
அதற்கான வேலைத்திட்டத்தையும் இவர்கள் இதுவரை முன்வைக்கவும் இல்லை. என்றாலும் ஜனாதிபதி ரணில் விக்ரமசிங்க ஜனாதிபதி தேர்தல் தொடர்பில் இதுவரை எந்தக் கருத்தும் தெரிவிக்கவில்லை. நாட்டை கட்டியெழுப்பும் முயற்சியிலேயே அவர் தொடர்ந்து ஈடுபட்டு வருகிறார். நாட்டை முன்னேற்றப் பாதைக்கு கொண்டுசெல்வதற்கான இலக்கொன்று அவரிடம் இருக்கிறது. அந்த இலக்கை நோக்கிய பயணத்தையே தற்போது அவர் மேற்கொண்டுவருகிறார். நாடு பாரிய பொருளாதார நெருக்கடியிலிருந்த சந்தர்ப்பத்தில் அன்று ஜே.ஆர் ஜெயவர்த்தன நாட்டை அபிவிருத்திசெய்ய மேற்கொண்ட நடவடிக்கையையே தற்போது ரணில் விக்ரமசிங்கவும் மேற்கொண்டுவருகிறார். அதனால் ஜனாதிபதித் தேர்தலுக்கு எதிர்க்கட்சிகள் தயாராகிவருகின்றபோதும் ரணில் விக்ரமசிங்க 2048ம் ஆண்டாகும்போது நாட்டை அபிவிருத்தியடைந்த நாடாக மாற்றும் வேலைத்திட்டத்தை படிப்படியாக மேற்கொண்டுவருகிறார். அதற்காகவே அவர் வெளிநாடுகளுக்கு பயணங்களை மேற்கொண்டு அந்த நாடுகளின் உதவிகளை பெற்றுக்கொள்ள புரிந்துணர்வு ஒப்பந்தங்களில் கைச்சாத்திட்டுவருகிறார். அத்துடன்
உத்தியோகபூர்வமாக ஜனாதிபதியின் பதவிக்காலம் அடுத்தவருடம் நவம்பர் மாதமளவிலேயே முடிவடைகிறது. அப்படி இருக்கும்போது எதிர்க்கட்சிகள் ஜனாதிபதி தேர்தலுக்காக ஏன் அவசரப்படவேண்டும் எனக்கேட்கிறோம்.
நாட்டின் பொருளாதாரத்தைக் கட்டியெழுப்பும் ஜனாதிபதியின் வேலைத்திட்டங்களை குழப்புவதற்கான நடவடிக்கையாகவே எதிர்க்கட்சிகள் ஜனாதிபதித் தேர்தல் பிரசாரத்தை கையில் எடுத்துள்ளன. அதனாலேயே தேசிய மக்கள் சக்தி ஜனாதிபதி வேட்பாளராக அனுரகுமார திஸாநாயக்கவை பெயரிட்டிருக்கிறது.
அதுதொடர்பில் நாங்கள் அலட்டிக்கொள்ளப்போவதில்லை. ஏனெனில் வங்குரோத்தடைந்திருந்த நாட்டை, அதிலிருந்து மீட்டு, நாட்டின் பொருளாதாரத்தை இயல்பு நிலைக்கு கொண்டுவர நடவடிக்கை எடுத்தது ரணில் விக்ரமசிங்க என்பது நாட்டு மக்களுக்குத் தெரியும். புதிய தலைவர் ஒருவரை நாட்டிற்கு கொண்டுவந்து, நாட்டுக்கு ஏற்பட்ட நிலை மக்களுக்கு தெரியும். அந்ததத் தவறை மக்கள் மீண்டும் செய்யமாட்டார்கள். அதனால் அரசியல் அனுபவமும் திறமையும் கொண்ட, சர்வதேச நாடுகளுடன் சிறந்த தொடர்புகளை மேற்கொள்ள முடியுமான ஒரே தலைவர் ரணில் விக்ரமசிங்க மாத்திரமே. ரணில் விக்ரமசிங்கவை தவிர வேறு யாருக்கும் நாட்டை கட்டியெழுப்பமுடியாது என்பதை மக்கள் உணர்ந்துள்ளார்கள். அதனால் அனுரகுமார திஸாநாயக்க ஜனாதிபதி வேட்பாளராக பெயரிடப்பட்டிருப்பது தொடர்பில் நாங்கள் அலட்டிக்கொள்ளப்போவதில்லை. நாட்டைக் கட்டியெழுப்பமுடியுமான ஒரே தலைவர் ரணில் விக்ரமசிங்க மாத்திரமே.
அவரால் நாட்டைக் கட்டியெழுப்ப முடியாமல்போனால் நாடு இல்லாமல்போகும். எனவே ஜனாதிபதித் தேர்தலில் பொதுவேட்பாளராக களமிறங்கவிருக்கும் ரணில் விக்ரமசிங்கவுக்கு அனுரகுமார திஸாநாயக்க ஒருபோதும் சவாலாகப்போவதில்லை.’ என்று தெரிவித்தார்.